A terra i Siderni

Dom, 06/01/2019 - 16:40

Figghjoli mei chi ppreju sta’ matina
pedalijandu supo u lungumari.
Appena arbisci, Sidernu è cchiglja i prima,
comu a na vota, chi ssi faci amari.

Ma poi m’abbertu ca chista passijata
esti canteri apertu, ferru e cimentu.
Avundi mi giru Sidernu è smindicata,
ca natura no sbagghia, ca ndavi u supravventu.

Cca’ di putihi, bar e stabilimenti
ndavi a ogni passu, non capi ormai cchju nnenti.
Ma chistu è normali, staci finendu a stati,
chistu esti u cuntu da nostra civirtati.

Na vota di Siderni si sapia
chera nu hiuri ppoiatu sup’o mari.
Non c’era pacciu chi potia cridiri
ca pe bellezza si potia appattari.

Mo’ jeu non sacciu cchiu chi t’imbattiu,
Sidernu mia, non sacciu chimmu penzu.
N’ta ddui hijumari restasti assulicata,
senza riparu e a nuda scumbogghjiata.

Stu gruppu n’ta gula, vogghiu u spocu,
ma restu mbelatu davanti ad ogni locu.
Non pozzu cchiu’ vidiri cosi storti,
n’to paisegliu meu tradutu a morti.

Era nattu u destinu i stu paisi,
riccu i profumu, d’arti e d’omini valenti.
Mo’, rijettati e ad ogni locu offisi,
all’occhi i tanti, simu menu i nenti.

T’abbrazzu mo’ Sidernu a mani chini.
Non m’accuttentu cchiu’ i sti restatini.

Ripigghju a bricichetta, rifazzu natta strata
…ca nostargia n’to’ cori du tempu di na vota

Autore: 
Martin
Rubrica: 
Tags: 

Notizie correlate